Parlamenti Evropian miraton kërkesën e Kroacisë për pranimin e euros si valutë

(KEYSTONE/AP Photo/Steffi Loos/dapd)

Parlamenti Evropian, me 539 vota nga 632 të pranishëm, ka votuar për pranimin e Kroacisë në Eurozonë.

Nga 1 janari 2023 ky vend do ta adaptojë përdorimin e euros si valutë.

Sipas njoftimit, PE-ja i ka bërë thirrje Qeverisë së Kroacisë që të sigurohet që pas hyrjes së euros në përdorim, të mos ketë ngritje artificiale të çmimeve.

Prej kur është bërë anëtare e BE-së, Kroacia ka parashtruar si prioritet të sajin edhe hyrjen në Eurozonë dhe në zonën e lirisë së lëvizjes së Schengenit.

Vendet që bëhen anëtare të BE-së e kanë obligim të vendosin euron si valutë të tyre, por koha varet nga dinamika e përmbushjes së kritereve që kërkohen.

Për momentin në Eurozonë janë 19 nga 27 vendet anëtare të BE-së, e me Kroacinë ky numër do të rritet në 20. Jashtë kësaj zonë mbeten Danimarka, e cila ka siguruar të ketë të drejtë përjashtimi dhe Suedia, Polonia, Çekia, Hungaria, Bullgaria dhe Rumania.