Parlamenti voton për orar të zgjatur të punës së shitoreve

Me 122 vota pro dhe 64 kundër, parlamentarët kanë vendosur që shitoret me pakicë kanë të drejtë që gjatë ditëve të punës të qëndrojnë të hapura nga ora 6 deri në orën 20

Në seancën e parë të sesionit pranveror të këtij viti, Dhoma Nacionale e Parlamentit të Zvicrës ka vendosur për lejimin e zgjatjes së orarit të shitoreve në gjithë Zvicrën. Me 122 vota pro dhe 64 kundër, parlamentarët kanë vendosur që shitoret me pakicë kanë të drejtë që gjatë ditëve të punës të qëndrojnë të hapura nga ora 6 deri në orën 20, ndërsa të shtunave nga ora 6 deri në orën 18, shkruan srf.ch.

Fillimisht ishte menduar që gjatë të shtunave të lejohej puna e shitoreve deri në orën 19 por me kundërshtimin e Partisë Socialdemokrate (SP/PS) dhe Partisë së Gjelbër u arrit kompromisi për orën 18, transmeton albinfo.ch.

Dhoma tjetër, ajo e Kantoneve (Senati) në sesionin e kaluar vjeshtor me vendimin e presidentit të saj kishte vendosur që të mos e merrte fare në shqyrtim ligjin përkatës.