Patrullime të përbashkëta policore mes Kosovës e Shqipërisë

Në zbatim të Memorandumit të Bashkëpunimit të lidhur ndërmjet Policisë Rrugore të Shqipërisë dhe asaj të Kosovës, që prej fillimit të muajit gusht vijojnë të zhvillojnë patrullime të përbashkëta në Rrugën e Kombit, Lezhë, Durrës dhe në akse të tjera rrugore që lidhin zonat bregdetare të vendit.

Objektivat madhorë të patrullimeve të përbashkëta janë bashkërendimi i burimeve policore dhe atyre logjistike, për parandalimin e aksidenteve dhe për rritjen e parametrave të sigurisë rrugore.

Këto objektiva synohet të përmbushen përmes këshillimit, orientimit dhe informimit të qytetarëve, turistëve dhe pushuesve, marrjes së masave për lehtësimin e qarkullimit rrugor dhe për shmangien e rradhëve të gjata, si dhe përmes konstatimit me mjete të teknologjisë bashkëkohore, dhe ndëshkimit konform ligjit, të shkelësve të rregullave të qarkullimit rrugor, transmeton atsh përcjell albinfo.ch.

Policia Rrugore apelon për qytetarët, turistët dhe pushuesit që të respektojnë rregullat e qarkullimit rrugor, pasi vetëm në këtë mënyrë mbrohet jeta dhe shëndeti i çdo përdoruesi të rrugës.

Gjithashtu, policia garanton reagim të menjëhershëm ndaj çdo kallëzimi për shkelje të këtyre rregullave.