Pensionimi, në moshën 67 vjeçare por “me kusht”

Sapo fondi për kompensim kërcënohet të bjerë nën masën 100 për qind sa u përket shpenzimeve vjetore, Këshilli Federal detyrohet t`i propozojë parlamentit marrjen e masave për korrektim. Dhe kur fodni në fjalë bie në 80 për qind, mosha e pensionimit do të rritet në 67 vjet.

Dhoma Nacionale e Parlamentit të Zvicrës synon që mosha për pensionim të rritet automatikisht në 67 (nga 65 sa është sot) në momentin kur fondi AHV (pensionet e moshës dhe trashëgimisë) bie në gjendje të rëndë financiare. Deputetët kanë votuar kështu në favor të rregullës së ashtuquajtur stabilizuese, shkruan srf.ch.

Mekanizmi që do ta mundësojë këtë shtyrje “me kusht” të moshës për pensionim ka dy shkallë. Sapo fondi për kompensim kërcënohet të bjerë nën masën 100 për qind sa u përket shpenzimeve vjetore, Këshilli Federal detyrohet t`i propozojë parlamentit marrjen e masave për korrektim, transmeton albinfo.ch. Dhe kur fondi në fjalë bie në 80 për qind, mosha e pensionimit do të rritet në 67 vjet.

Bazuar në vendimet e Dhomës Nacionale, duket se do të jetë i pashmangshëm aktivizimi i automatizmit. Dhe pikërisht kundër kësaj mundësie kanë reaguar deputetë nga SP/PS dhe CVP/PDC.

SP po ashtu ka kërcënuar se kundër shtyrjes së moshës për pensionim do të duhet të shkohet edhe me referendum. “Populli me siguri nuk do të pranojë një shtyrje të tillë”, ka thënë një deputete socialdemokrate.

Pas Dhomës Nacionale, me instrumentin e stabilizimit tash pritet të merret edhe Dhoma e Kantoneve.