Pensionistët kërkojnë rritjen e pensionit mbi 200 euro

Pensionistët kosovarë kanë marrë iniciativën që nëpërmjet një peticioni të kërkojnë rritjen e pensioneve

Pensionistët nuk po e durojnë më gjendjen e rëndë të tyre.  Nëpërmjet një peticioni pensionistët kosovarë po kërkojnë rritjen e pensioneve.

“Me 10 janar 2012, fillon nënshkrimi i peticionit publik lidhur me kërkesat e pensionistëve të Kosovës, adresuar Qeverisë dhe Parlamentit”, thuhet në komunikatën e lëshuar nga Koalicioni i Pensionistëve.

Nëpërmjet këtij peticioni ata kërkojnë që pensioni mesatar i tyre të jetë i barabartë me 60 për qind e pagës mesatare në Kosovë, e cila sillet diku rreth 350 euro. Koalicioni i Pensionistëve të Kosovës, i ka ftuar qytetarët që të solidarizohen me pensionistet, duke nënshkruar peticionin.

Përveç kërkesës për rritje të pensioneve, pensionistët kanë kërkuar nga Kuvendi i Kosovës që të mos e miratojë Draftligjin për skemat e pensioneve të financuara, subvencione për pensionistët deri në rritje të pensionit, kthimin e pronave të shoqatave të pensionistëve si dhe mbajtjen e një mbledhje plenare për të diskutuar për gjendjen e pensionistëve.