Për 4 nga 5 gjermanë, të huajt janë problemi më akut i vendit!

Katër nga pesë persona në Gjermani e konsiderojnë migracionin dhe integrimin e të huajve si njërin ndër problemet aktuale më të mprehta të vendit. Në krahasim me një vit më parë, qëndrimi negativ ndaj të huajve është rritur më shumë se dy fish!

Fluksi i madh i refugjatëve që kanë ardhur gjatë këtyre dy viteve në Gjermani ka rritur shkallën e frikës së popullatës vendëse ndaj të huajve. Këtë e kanë përforcuar edhe zhvillimet e dhunshme të kohëve të fundit në vende të ndryshme evropiane të shkaktuara nga të huajt, shkruajnë mediat gjermane

Kështu, sipas një ankete të zhvilluar së fundi nga Instituti për hulumtimin e opinionit GFK, katër nga pesë persona në Gjermani e konsiderojnë migracionin dhe integrimin e të huajve si njërin ndër problemet aktuale më të mprehta të vendit, transmeton albinfo.ch. Se sa është ashpërsuar ky problem tregon fakti se në krahasim me një vit më parë, qëndrimi negativ ndaj të huajve është rritur më shumë se dy fish!

Migracioni dhe integrimi janë aktualisht ndër preokupimet më të mëdha edhe për shtete tjera të Evropës Perëndimore, përcjell albinfo.ch. Kështu, në Zvicër 50 për qind të banorëve e konsiderojnë si sfidë problemin me të huajt ndërsa në Austri kjo përqindje është madje 66%.

Megjithatë, po u shikua problemi te të gjitha shtetet ku u zhvillua sondazhi, numri më i madh i njerëzve, si probleme emergjente i konsiderojnë rritjen e çmimeve dhe papunësinë.

Për këtë sondazh janë pyetur 28.000 persona në 24 vende të Evropës.