Për dialogun mblidhen liderët, s’duhet të diskutohet për ndryshim të kufijve

Kundërshtimin që ka për ndryshimin e kufijve, kryeministri i Kosovës, Ramush Haradinaj, ia ka bërë të qartë edhe presidentit, në takimin e zhvilluar sot në mëngjes.

Ai bashkë me liderin e PDK-së, Kadri Veseli, e atë të Nismës, Fatmir Limaj, si dhe Dardan Gashin, kanë takuar presidentin Hashim Thaçi, ku temë kryesore ka qenë dialogu me Serbinë. Pas takimit që ka zgjatur rreth një orë, kryeministri ka thënë se janë konsultuar në lidhje me procesin e dialogut në Bruksel, përcjell albinfo.ch.

Haradinaj tha se kanë folur për parimet e dialogut dhe se e ka shprehur qëndrimin e qartë se nuk duhet të diskutohet për kufijtë dhe territorin e Kosovës.

Sipas tij, këtë qëndrim ia ka bërë të qartë të parit të shtetit dhe vetë ai ka shprehur qëndrim se nuk do të ketë shkëmbim të territoreve.

“Me rëndësi është që presidenti u shpreh qartë se nuk do të ketë ndarje të Kosovës. Respekton territorin dhe integritetin, pra respekton e punon në bazë të Kushtetutës, kështu që nuk diskutohet dhe nuk pranon të diskutojë për ndarjen e vendit. Ajo që është me rëndësi është të qartësohet qëllimi institucional, pra që territori dhe kufijtë nuk diskutohen në asnjë dialog”, është shprehur pas takimit Haradinaj.

Kryeministri ka përsëritur rëndësinë e përfshirjes së opozitës në këtë proces.