Për një muaj, dy mijë kamionë me mallra nga Serbia hynë në Kosovë

Që kur Qeveria e Kosovës e hoqi ndalesën për importet nga Serbia, dy mijë kamionë me mallra kanë hyrë në Kosovë nga ky shtet.

Sipas drejtorit të Doganës, Agron Llugaliu, ekipet përkatëse kanë arritur të kontrollojnë mesatarisht 85 dërgesa në ditë, në gjashtë ditë të javës gjatë këtij muaji.

“Rreth 2 mijë mauna… Rreth 1 milion, 1 milion e gjysmë, dominojnë mallrat që përdoren si lëndë e parë për prodhimtari në Kosovë, imputet e bujqësisë dhe produktet e gatshme ushqimore në përgjithësi”, ka thënë Llugaliu.

Vitin e shkuar, Qeveria ka vendosur t’i ndalojë importet nga Serbia pas kapjes së tre policëve kosovarë nga forcat serbe, tensioneve në veri dhe dyshimeve se nëpërmjet mallrave janë futur ilegalisht armë, e cila u hoq para një muaji pas presionit të ndërkombëtarëve.