Për ruajtjen e shtëpive tradicionale, vlerësohet Himara

Udhëzuesi praktik për mbrojtjen dhe ruajtjen e shtëpive tradicionale në fshatrat e bregdetit të Himarës është vlerësuar së fundmi me Çmimin e nderit në kategorinë e Dizajnit Urban gjatë ceremonisë së Çmimeve të Ekselencës së INTBAU 2018, që është mbajtur në Londër, transmeton albinfo.ch.

Kryetari i Bashkisë së Himarës, Jorgo Goro, në një postim në rrjetet sociale ka thënë se anëtarët e jurisë krijuan bindjen se ndikimi që udhëzuesi mund të ketë në ruajtjen e trashëgimisë dhe zhvillimin e vendbanimeve rurale në rivierën shqiptare bëri që ata të marrin këtë vlerësim.

“Ceremonia u zhvillua në “Royal Society of Arts”, në Londër, gjatë Kongresit Botëror të INTBAU 2018, një forum që zhvillohet çdo dy vjet, i cili bashkon perspektivat dhe njohuritë globale në diskutim dhe debat mbi çështje të ndryshme sfiduese, me të cilat përballet mjedisi i ndërtuar dhe komunitetet rreth botës sot.

Udhëzuesi është hartuar në kuadër të programit “Zhvillimi i integruar dhe i qëndrueshëm i rajonit bregdetar jugor”, zbatuar nga GIZ-i i Shqipërisë, përfitues janë Bashkia e Himarës dhe komuniteti i fshatrave”, ka shkruar ai. Shtëpit e fshatrave të bregdetit të Himarës përfaqësojnë dhe reflektojnë traditat në ndërtim dhe stilin e jetesës.