Për veteranët e rrejshëm flet kryeprokurori Millaku

Kryeprokurori i Prokurorisë Speciale, Reshat Millaku në një konferencë për media ka folur për aktakuza e ngritur për 19 mijë veteranët e rrejshëm për të cilët ka kërkuar të ndërpritet pagesa.

Millaku ka thënë se aktakuza e ngritur nga prokurori special Elez Blakaj, është e mangët dhe kjo ka qenë arsyeja pse nuk është dorëzuar në Gjykatë.  “Është bërë pune voluminoze që ka marrë kohë. Gjatë hetimeve kam pasur kontakt me prokurorin dhe e kam sugjeruar që kur të bëhet finalizimi i emrave të nxirren emrat, mbiemrat e tyre, gjyqtarit t’i bëhet kërkese që t’u bëhet ngrirja e të ardhurave të tyre. Kjo është vepra penale që i ka shkaktuar dëm në vlerë më të madhe buxhetit të Kosovës që nga paslufta”, ka thënë ai, përcjell albinfo.ch.

Millaku ka thënë se nuk janë të ndikuar nga politika dhe se në momentin që bashkëngjiten aktakuzës emrat e personave që dyshohet se janë veteranë të rrejshëm, ajo do të dërgohet në Gjykatë.

Kryeprokurori i Speciales është munduar të zhvlerësojë punën e prokurorit Elez Blakaj.  “Blakaj ka ardhur një dite në zyre dhe më ka thënë se ka ardhur të konsultohet për një çështje familjare dhe më ka thënë se më kanë ofruar një punë të mirë në Amerikë. Unë i thash që më vjen keq nëse shkon ti, sepse e lë keq prokurorinë, pa i thënë shko ose mos shko. Pas disa ditësh, më ka sjellë aktakuzën, që është disa ditë para 11 korrikut, të panënshkruar”, tha Millaku.