Për vrasjen e gruas dhe vajzës dënohet me 24 vjet burgim

Rreth tre muaj pas ngjarjes që tronditi Kosovën, është dhënë dënimi për 43-vjeçarin që ekzekutoi ish-bashkëshorten dhe vajzën e tij 9-vjeçare.

Pjetër Nrecaj është dënuar me 24 vjet burgim për vrasjen e bashkëshortes, Valbonës dhe vajzës së tij K.N. Nrecaj, si dhe u dënua edhe për armëmbajtje pa leje.

Më 31 tetor në Gjykatën Themelore të Gjakovës, Pjetër Nrecaj është deklaruar sërish fajtor për dy veprat penale që akuzohet: vrasje e rëndë dhe armëmbajtje pa leje. Vrasjen e vajzës së tij, e ka konsideruar aksidentale, përcjell albinfo.ch.

“Dihet se dy anëtarë të familjes i kam humbur. Edhe vajzën e vogël aksidentalisht, e pranoj fajësinë dhe jam i penduar”, kishte thënë Nrecaj.

Valbona Nrecaj ishte në proces divorci me të shoqin, ndërsa u qëllua për vdekje mbrëmjen e 7 gushtit, kurse pesë orë më herët ajo kishte njoftuar policinë për kërcënimet që po i bëheshin nga ai.