Peticion për kushtet e punës në shtëpitë e pleqve

Me peticionin “Përkujdesja e mirë dhe mbështetja kërkojnë kushte të mira pune” kërkohet, veç tjerash, vende të sigurta pune, personel dhe para të mjaftueshme, paga korrekte dhe shtesa

Ata ose ato që punojnë në shtëpi të pleqve ose në qendra të tjera të përkujdesjes, në të ardhmen duhet që këtë punë ta bëjnë nën kushte më të mira pune. Një peticion me këtë kërkesë e ka organizuar sindikata Unia, shkruan srf.ch. Ajo ka arritur t`i grumbullojë mbi 10 mijë nënshkrime për këtë peticion dhe e ka dorëzuar atë, sipas procedurës, në Kancelarinë Federale, në Bernë.

Me peticionin “Përkujdesja e mirë dhe mbështetja kërkojnë kushte të mira pune” kërkohet, veç tjerash, vende të sigurta pune, personel dhe para të mjaftueshme, paga korrekte dhe shtesa. Po ashtu kërkohet edhe vlerësimi i drejtë për punën e realizuar, thuhet në një komunikatë të sindikatës.

Peticioni vjen si rezultat i Konferencës Nacionale “Përkujdesja dhe mbështetja” që është mbajtur të martën që shkoi.