Pfister (CVP/PDC) kërkon përparësi për refugjatët e krishterë

Gerhard Pfister është deklaruar për pranimin e refugjatëve të përkatësisë fetare të krishterë me përparësi ndaj të tjerëve

Kandidati për kreun e CVP/PDC (Partia Demokrostiane e Zvicrës) njëherësh deputet nacional, Gerhard Pfister ka bërë dje një deklaratë që ka polarizuar spektrin politik të vendit.

I ftuar në emisionin “Rundschau” të televizionit publik, Pfister është deklaruar për pranimin e refugjatëve të përkatësisë fetare të krishterë me përparësi ndaj të tjerëve. Po ashtu ai ka thënë se përparësi duhet të kenë gratë dhe fëmijët, transmeton albinfo.ch. Ndërsa ka folur gjithashtu edhe për një kufizim të numrit të refugjatëve që mund t`i presë Zvicra brenda vitit, në 25 mijë sish.

Lidhur me deklarimin e tij janë shprehur krerët e partive të tjera parlamentare të Zvicrës. Të gjithë, përveç kryetarit të SVP/UDC-së kanë kundërshtuar kolegun e tyre.

Ditë më parë, edhe ipeshkvi i Bazelit, Felix Gmür kishte kërkuar që Zvicra të pranonte me përparësi refugjatët e krishterë. Ai kishte arsyetuar këtë kërkesë me ndjekjen dhe diskriminimin që ushtrohet ndaj pakicave të krishtera në disa vende arabe të përfshira nga konfliktet.

20minuten ka bërë një anketë me lexuesit, nga e cila del se 37% e përkrahin qëndrimin që të krishterët të trajtohen me prioritet, përcjell albinfo.ch. Ndërsa për 63% të tjerë, religjioni nuk duhet të luajë asnjë rol me rastin e pranimit të refugjatëve.