Policia ndërmerr masa për ruajtjen e rendit gjatë protestës në Prishtinë

Protesta e qytetarëve pranë objekteve të Qeverisë dhe Kuvendit të Kosovës ka vazhduar edhe gjatë orëve të mbrëmjes.

Policia e Kosovës ka angazhuar njësi të ndryshme për ruajtjen e rendit dhe sigurisë publike, si dhe për mbarëvajtjen e protestës dhe mbrojtjen e objekteve shtetërore.

Sipas Policisë, gjatë protestës një grup pjesëmarrësish ka hedhur sende të ndryshme, mjete piroteknike dhe fishekzjarre në drejtim të objekteve shtetërore. Po ashtu, protestuesit kanë penguar lëvizjen dhe daljen e disa deputetëve dhe personaliteteve nga Kuvendi.

Policia ka bërë thirrje vazhdimisht që protesta të zhvillohet në mënyrë të qetë dhe që të mos dëmtohet prona publike apo të pengohet lëvizja e qytetarëve.

Për shkak të situatës së krijuar, zyrtarët policorë kanë përdorur mjete të ligjshme policore, përfshirë gazin lotsjellës, me qëllim të vënies së situatës nën kontroll dhe mundësimit të lëvizjes së lirë.

Si pasojë e incidenteve, janë shkaktuar dëme materiale, ndërsa sipas Policisë, deri tani nuk është raportuar për persona me lëndime serioze.

Policia e Kosovës ka ritheksuar se e njeh të drejtën e qytetarëve për protestë dhe shprehje të pakënaqësive në mënyrë paqësore dhe demokratike. Zyrtarët policorë do të vazhdojnë të jenë të pranishëm në terren për të garantuar sigurinë e qytetarëve dhe objekteve shtetërore.