Policia në kërkim të çiftit belg që humbi në Himarë

Policia shqiptare është vënë në kërkim të një çifti turistësh nga Belgjika, që ka humbur gjurmët prej mbrëmjes së të enjtes në zonën malore përreth Bashkisë së Himarës.

Çifti me moshë rreth 55 vjeç kanë dalë për shëtitje alpinizëm, por më pas ka humbur kontaktet, raportojnë mediat shqiptare.

Kërkimet kanë vazhduar përgjatë të gjithë natës nga efektivë të policisë së Himarës, ndërsa edhe në këto çaste po kërkohet në malet e fshatit Vranisht, ku dyshohet se mund të kenë qëndruar, përcjell albinfo.ch.

Po ashtu e ditur bëhet se ata nuk kanë lënë pas ndonjë gjurmë dhe shenjë duke e bërë shumë të vështirë gjetjen e tyre.

Në ndihmë janë vendosur edhe banorët e zonave, pasi së fundmi turistët u shikuan duke shëtitur në fshatin Ilias. Zona e Llogarasë dhe e Dhërmiut janë të mbushura me pamje dhe vende atraktive për tu vizituar , gjë e cila mund të ketë bërë që turistët të shkonin në një destinacion por të mos e gjenin më rrugën e kthimit.