Politikanët e rinj, kundër votës së dyfishtë për të rinjtë!

Kanë qenë kryetarët e të rinjve të SP-PS-së (JUSO), të SVP/UDC-së dhe të FDP/PLR-së ata që kanë thënë se nuk u intereson favorizimi i të rinjve para kutive të votimit

Keystone

Një shqetësim i kahershëm në shoqëritë e zhvilluara është plakja e popullatës, gjegjësisht rritja e numrit të të moshuarve në krahasim me atë të të rinjve. Këtë problem e ka gjithsesi edhe Zvicra dhe ai bëhet më i theksuar veç tjerash edhe kur është fjala për pjesëmarrje në votime, në zgjedhje e referendume.

Kështu, shtetasit e moshës së pensionit janë gjithmonë më të zellshëm se të tjerët, sa herë që duhet hedhur votën. Kjo e bën votimin të ketë tendencë konservative, shkruan albinfo.ch. Në një vend si Zvicra. që e hedh në votë të thuash çdo çështje në nivel lokal a nacional kjo luan rol të konsiderueshëm.

Nisur nga një situatë e tillë, anëtarja e Qeverisë së Kantonit të Cyrihut, Jacqueline Fehr nga SP ka propozuar që votat e të rinjve të llogariten dyfish, shkruan gazeta “SonntagsBlick”. Në këtë mënyrë, sipas saj do të shmangej “majorizimi” i të rinjve nga të moshuarit.

Por, është interesante se përgjigja refuzuese politikanes socialdemokrate i ka ardhur pikërisht nga të rinjtë, edhe ata të partisë së vet!

Kanë qenë kryetarët e të rinjve të SP-PS-së (JUSO), të SVP/UDC-së dhe të FDP/PLR-së ata që kanë thënë se nuk u intereson favorizimi i tillë i të rinjve para kutive të votimit.

“Ideja bie në kundërshtim me kuptimin që kemi me për demokracinë”, ka thënë kryetarja e JUSO-s Tamara Funciello, transmeton albinfo.ch. Kryetari i të rinjve të SVP/UDC-së, Benjamin Fischer lidhur me këtë çështje ka thënë: “Legjitimimi demokratik realizohet mbi parimin `Një qytetar, një votë`. Çdo gjë tjetër është arbitraritet”.

Ndërsa i pari i të rinjve të FDP/PLR-së, Andri Silberschmidt është shprehur se “e drejta e votimit nuk duhet të përshtatet, ndryshohet vetë nisur nga shkaku se të rinjtë në të ardhmen do të përbëjnë pakicë edhe më të vogël në trupin zgjedhor”.