Portal për integrim, në 13 gjuhë

Nga fillimi i prillit, Zyra Kantonale për Migracion dhe Integrim e Aargaut ka promovuar një portal të ri me informacione për të huajt dhe për ata që kanë ardhur të jetojnë në Kantonin Aargau nga kantonet tjera.
Portali i quajtur Hallo-aargau.ch ofron informacione në 13 gjuhë të ndryshme duke filluar nga gjuha gjermane. Gjithsesi në mesin e tyre është edhe gjuha shqipe si njëra ndër gjuhët më të folura në këtë kanton.

Portali është menduar si një mjet për lehtësimin e integrimit të të huajve dhe për të shkarkuar autoritetet komunale nga ngarkesa e madhe. Përveç për të huajt, kjo faqe interneti përmban informata praktike edhe për të gjithë të interesuarit tjerë, shkruan azonline.ch.

Gjuhët në të cilat janë dhënë informacionet janë: gjermanisht, shqip, anglisht, frëngjisht, italisht, turqisht, boshnjakisht/kroatisht/serbisht, spanjisht, portugalisht, arabisht, japonisht, gjuha tamile dhe ajo tigrine.

Përmbajtja është shtruar në 12 fushat tematike që vijojnë: “Kantoni Aargau”; “Mirë të dihet”; “Gjuha dhe integrimi”; “Partneriteti dhe fëmijët”; “Shkolla dhe arsimi”; “Puna”; “Shëndeti”; “Siguria sociale”; “Banimi”; “Paratë dhe tatimet”; “Mobiliteti”; “Urgjenca dhe këshillimoret”.