Portieri shqiptar kërcënohet me dëbim nga Franca

Foto ilustrim

Ka mundur të jetë një shembull i integrimit të shpejtë, të shëndetshëm dhe të motivuar. Dëshira e shumë të huajve në kërkim të një jete të re idilike.

Por, ëndrra ndonjëherë nganjëherë mund të bëhet edhe një makth … I ardhur në Francë shtatorin e kaluar, Shkëlzen Demaliaj nuk e la Shqipërinë e tij për pikë të qejfit.

Siç thotë edhe vet ai nënjë frengjishte të rrjedhshme, këtë e ka bërë “thjesht për t’iu shmangur persekutimeve të përhershme politike”, shkruan “La Depeche”, përcjell Albinfo.ch. Pas një qëndrimi të përkohshëm në Foix, i organizuar nga Qendra për pranimin e refugjatëve (Cada), ai aktualisht jeton në Villemur-sur-Tarn, në veri të Toulouse, ende në pritje.

Aty më në fund lindi një shpresë e vogël, duke i falënderuar futbollit. Ish portieri i një ekipi të ligës së parë, Shkëlzeni tani është anëtar i ekipit të Villemur-sur-Tarn.

Pritja që ia kanë organizuar, tek ai ka shkaktuar buzëqeshje: “Gjithmonë do t`i kujtoj ato momente! Portieri ishte lënduar. Propozova ta zëvendësoj pa përmendur situatën time. Stërvita dhe pastaj luajta. Gëzimi është edhe më i madh pasi gjatë këtij sezoni, ekipi është inkuadruar në një rang më të lartë. Sot i ushtroj të rinjtë. Është kënaqësi e madhe. Sporti ju bën t`i harroni fatkeqësitë tuaja”. Kjo ndonjëherë dëshmohet, informon më tej Albinfo.ch.

Por në këtë rast, gëzimi ishte jetëshkurtër. Në fund të nëntorit, Shkëlzeni, bashkëshortja e tij dhe djali i tij njëvjeçar do të duhet të lirojnë vendbanimin e tyre.

Dhe ata ndoshta do të duhet të largohen së shpejti nga vendi, informon Albinfo.ch. Gjykata franceze e azilit ua ka mohuar këtë të drejtë, edhe duke hedhur poshtë statusin e kërkuar të refugjatit. Kjo do të thotë edhe përfundim të ndihmës gjatë strehimit.

Tashmë i është ofruar edhe ndihma për një kthim në vendlindje, por Shkëlzeni nuk e dëshiron atë me arsye. Një ushtar profesional, anëtar i Gardës së Republikës i ngarkuar për mbrojtjen e ish kryeministrit dhe ministrit të Brendshëm shqiptar, anëtar i Partisë Demokratike, Shkëlzeni kishte kundërshtuar fuqishëm qeverinë e re.

Dhe, për këtë ai kishte pasoja: “Ma bllokuan karrierën time. Një ditë, bashkëshortja ime u sulmua. U përpoqa të kundërvihesha pak, të ndryshoja punët. Por u dashtë të largohemi. Gruaja ime fillimisht shkoi tek motra e saj në Itali. Pastaj përfunduam në Francë. Ne bëjmë gjithçka që të jemi diskret dhe të përshtatemi për të qëndruar”, thotë Shkëlzeni, transmeton Albinfo.ch.

Me këtë rast, ai ka parashtruar ankesë në instancë më të lartë.