Presidentja e Republikës së Kosovës, Justina Shiroka Pula, ka nderuar sot 14 ushtarët britanikë që humbën jetën gjatë shërbimit në Kosovë, në kuadër të forcave paqeruajtëse të NATO-s dhe KFOR-it, përcjell albinfo.ch.
Ceremonia përkujtimore u organizua nga Ambasada Britanike në Prishtinë, me rastin e Ditës së Përkujtimit të Mbretërisë së Bashkuar, në nderim të ushtarëve që dhanë jetën gjatë shërbimit në konflikte të armatosura.
Në ceremoni morën pjesë ambasadori britanik në Kosovë, Jonathan Hargreaves, komandanti i KFOR-it, gjeneralmajor Roberto Vergori, ministri i Mbrojtjes, Ejup Maqedonci, komandanti i FSK-së, gjenerallejtënant Bashkim Jashari, si dhe përfaqësues të korit diplomatik.
Gjatë ceremonisë u vendosën lule pranë memorialit të ushtarëve britanikë të rënë në Kosovë, ndërsa të pranishmit nderuan kujtimin dhe sakrificën e tyre.
Presidentja Shiroka Pula shprehu mirënjohje të thellë për kontributin e ushtarëve britanikë, duke theksuar se Kosova do ta kujtojë gjithmonë mbështetjen e Mbretërisë së Bashkuar dhe përkushtimin e ushtarëve të saj, të cilët dhanë jetën në shërbim të paqes dhe sigurisë së vendit.
Dita e Përkujtimit shënohet çdo vit në Mbretërinë e Bashkuar për të nderuar pjesëtarët e forcave të armatosura që kanë humbur jetën gjatë shërbimit. /Albinfo.ch
