Gjithsej 79 persona kanë humbur jetën si pasojë e aksidenteve në trafikun rrugor në Kosovë gjatë tetë muajve të parë të vitit 2026, sipas të dhënave të Policisë së Kosovës, përcjell albinfo.ch.
Gjatë periudhës janar deri në gusht janë regjistruar 74 aksidente me fatalitet, prej të cilave 22 kanë qenë vetaksidente. Nga numri i përgjithshëm i viktimave, 44 kanë qenë drejtues të automjeteve.
Zëdhënësi i Policisë së Kosovës, Daut Hoxha, ka bërë thirrje për kujdes të shtuar në trafik dhe respektim të kufizimeve të shpejtësisë, me qëllim parandalimin e aksidenteve me pasoja fatale.
Policia ka njoftuar se ka shtuar praninë e njësive policore në terren, mbikëqyrjen dhe kontrollet në rrugë, në kuadër të masave për rritjen e sigurisë dhe parandalimin e aksidenteve. /Albinfo.ch
