Pritet fazë e re e luftës së Rusisë në Ukrainë, thotë inteligjenca britanike

Luftimet mund të përqendrohen në territor prej 350 kilometrash që përshkon qytetin e Zaporizhjas dhe atë të Hersonit.

Inteligjenca ushtarake e Britanisë së Madhe ka thënë se lufta e Rusisë në Ukrainë pritet të hyjë në fazë të re, pasi luftimet mund të përqendrohen në territor prej 350 kilometrash që përshkon qytetin e Zaporizhjas dhe atë të Hersonit.

Në një postim në Twitter, Ministria britanike e Mbrojtjes ka thënë se ka shumë mundësi që forcat ruse janë duke u mbledhur në jug të Ukrainës, në pritje të ndonjë kundërsulmi, apo janë duke bërë përgatitje për sulm tjetër, raporton Albinfo.ch.

Nga rajoni Donbas i Ukrainës vazhdojnë të largohen konvoje të gjata të kamionëve dhe tankeve ushtarake ruse, me artileri dhe armë të tjera, dhe po lëvizin drejt jugperëndimit.

Autoritetet britanike kanë thënë se grupet taktike të batalionit, që përbëhen nga 800 në deri 1000 trupa janë angazhuar në Krime dhe ka mundësi që ato të shfrytëzohen për t’iu ofruar mbështetje trupave ruse në rajonin e Hersonit.

Sipas tyre, forcat e Ukrainës janë duke vënë fokusin në ura, depo municioni dhe linja hekurudhore që janë të rëndësishme për rajonet jugore, duke përfshirë linjat që lidhin Hersonin me Krimenë e pushtuar nga Rusia./Albinfo.ch

---