Prodhimet vendore, cilësi pa standarde

Bizneset në Kosovë vazhdojnë të ballafaqohen me probleme të shumta gjatë ushtrimit të veprimtarisë së tyre.

Disa përfaqësues kanë deklaruar se në mungesë të infrastrukturës së nevojshme, shumë herë produktet e tyre nuk mund të jenë konkurrente në treg.

Kompania “Pestova” në Vushtrri, e cila merret me kultivimin e patates, ka prezantuar produktet në panairin shitës të prodhimeve ushqimore në Prishtinë. Përfaqësuesi i saj, Sokol Hajdari, thotë se mungon ende vetëdijesimi i nevojshëm i popullatës për të konsumuar produkte vendore, raporton Radio Evropa e Lirë.

Vështirësitë me të cilat përballen bizneset në Kosovë, kanë të bëjnë me furnizimin jo të qëndrueshëm me energji elektrike dhe me ujë. Barrierë për zhvillim të shpejtë është thënë të jetë edhe qasja e kufizuar në financa, si dhe normat e larta të interesit për kredi.

Se ekzistojnë vështirësi për veprimtarinë e bizneseve pohon edhe kryetari i Organizatës Joqeveritare “Konsumatori”, Selatin Kaçaniku. Megjithatë, ky i fundit i kritikon ato për cilësinë e dobët të produkteve që fusin në treg.

Bizneset kosovare vazhdimisht janë ankuar për ambient të pafavorshëm biznesor. Por, deri më tani nuk është bërë diçka konkrete në këtë drejtim, ndërkohë që edhe prodhuesit vendorë janë kritikuar për prodhime jocilësore.