Propozohet e drejta e votës edhe për fëmijët!

Fëmijët nuk do të shkonin në kutitë e votimit por vetëm prindërit e tyre do të përfitonin një votë më tepër. Nisur nga fakti se në Zvicër ka gjithnjë më tepër njerëz të moshuar dhe ata shkojnë më së shpeshti për të votuar, në vitin 2035 votuesit e moshës mbi 60 vjeçare do t`i “mbivotonin” të rinjtë

Keystone

Edhe fëmijët duhet të fitojnë të drejtën e votës. Këtë e kërkon grupi i ekspertëve i mbledhur rreth “Avenir Suisse”, shkruajnë gazetat “Zentralschweiz am Sonntag” dhe “Ostschweiz am Sonntag”.

Por, sipas propozimit të këtij institucioni, vet fëmijët nuk do të shkonin në kutitë e votimit por vetëm prindërit e tyre do të përfitonin një votë më tepër, transmeton albinfo.ch.

Gazetat e përmendura kanë përfolur një dokument të “Avenir Suisse” i cili është i pabotuar. Sipas këtij dokumenti, një kërkesë e tillë bëhet për shkak të plakjes së popullatës zviceran. Nisur nga fakti se në Zvicër ka gjithnjë më tepër njerëz të moshuar dhe ata shkojnë më së shpeshti për të votuar, në vitin 2035 votuesit e moshës mbi 60 vjeçare do t`i “mbivotonin” personat e rinj me të drejtë vote dhe me këtë edhe votuesit që janë ende në marrëdhënie pune.

Sipas “Avenir Suisse”, në këtë perspektivë do të bëhen veçanërisht të vështira reformat në lëmin social, përcjell albinfo.ch. Lidhur me të gjitha këto, ky grup ekspertësh hedh në diskutim edhe të drejtën e votës nga mosha 16 vjeçare si dhe mundësinë e një të drejte të kufizuar të votës për të huajt.