Qindra mijëra nxënës të shkollave të mesme në Francë po protestojnë për uljen e numrit të nxënësve në klasa, më shumë mësimdhënës dhe përmirësimin e infrastrukturës shkollore. Lëvizja po ndiqet me interes edhe nga nxënësit në Zvicrën frankofone, ku kushtet e arsimit janë dukshëm më të mira.
Sipas të dhënave të publikuara nga Radio Televizioni Zviceran (RTS), në arsimin pas përfundimit të shkollimit të detyrueshëm në Zvicrën frankofone ka mesatarisht 21,5 nxënës për klasë, ndërsa në Francë kjo shifër arrin në 30,4.
Nxënësit zviceranë i ndjekin protestat përmes rrjeteve sociale, duke shprehur habi për kushtet në disa shkolla franceze. Ndërkohë, në Saint-Julien-en-Genevois, pranë Gjenevës, nxënësit francezë protestuan në mënyrë paqësore për mbipopullimin e klasave dhe mungesën e mësimdhënësve.
Në kantonin Valis, gjatë dhjetë viteve të fundit janë investuar rreth 900 milionë franga zvicerane në arsimin e mesëm, ndërsa shuma arrin në 1,2 miliardë franga kur përfshihen edhe investimet e komunave.
Ndërkohë, thirrjet për bllokimin e shkollave janë përhapur edhe në Zvicrën frankofone, por nuk kanë gjetur mbështetjen e pritur. Autoritetet kanë ndërmarrë masa parandaluese pas disa thirrjeve që përmbanin kërcënime për akte të dhunshme.
Në Francë, si pjesë e reagimit ndaj pakënaqësive të nxënësve, është nisur një proces konsultimi, ndërsa disa shkolla pritet të ndajnë një orë në javë për diskutime me nxënësit.
