Publikohen studimet e para për diasporën

Projekti “Diaspora për Zhvillim” më 29 dhe 30 mars në bashkëpunim me QPA dhe AGPK, publikon studimin “Për një përfaqësim të drejtë të diasporës në vendimmarrje” dhe studimin “Përmirësimi i komunikimit dhe informimit ndërmjet Kosovës dhe Diasporës”

Projekti “Diaspora për Zhvillim”, mbështetur nga Zyra Zvicerane për Zhvillim dhe Bashkëpunim – SDC në Kosovë, i cili zbatohet nga Instituti për Menaxhim dhe Zhvillim– IMD me konsulentë nga “Solidar Suisse”, si rezultat i punëtorive me pjesëtarët e Diasporës dhe Kosovës,  si dhe bazuar në rezultatet e sondazhit të realizuar në portalin albinfo.ch gjate verës së kaluar  ka mandatuar Qendrën për Politika dhe Avokim që të realizoj një studim rreth praktikave më të mira të përfaqësimit politik të diasporës, mundësive dhe potencialit.

Raporti i Studimit do prezantohet të premten më datë: 29 mars 2013 ne Hotel Sirius nga ora 09:00, me pjesëmarrës nga Kosova dhe Diaspora. Qëllimi i kësaj konference është të zgjerojë debatin tek shoqëria Kosovare, institucionet vendore përshirë Qeverinë e Kosovës, legjislativin dhe mediat (në Kosovë dhe Diasporë) për t’i gjetur format më të mira të përfaqësimit të Diasporës kosovare ne proceset vendimmarrëse në Kosovë, si në nivelin qendror po ashtu edhe në atë lokal.

Njëherësh IMD ka mandatar Agjencinë e Gazetarëve Profesionistë të Kosovës (AGKP) dhe Albinfo (Aktualiteti i Shqiptareve në Zvicër) për të realizuar studimin “Përmirësimi i komunikimit dhe informimit ndërmjet Kosovës dhe Diasporës’. AGPK ka analizuar kanalet formale dhe joformale të informimit dhe komunikimit ndërmjet Kosovës dhe Diasporës dhe ka dhënë një pasqyrë se si shtetet tjera komunikojnë dhe e informojnë diasporën e tyre.

Raporti i këtij studimi do prezantohet të shtunën më  30 mars 2013 ne Hotel Sirius nga ora 09:00, me pjesëmarrës nga Kosova dhe Diaspora. Qëllimi i kësaj konference është që të nxitet debati te akterët relevant në Kosovë dhe diasporë për t’i gjetur format më të mira të përmirësimit të komunikimit dhe informimit  institucional ndërmjet Kosovës dhe Diasporës.