Punëtorët e KEDS-it kërkojnë rritje të pagave

Pas protestave disaorëshe para ndërtesës së KEDS-it dhe Qeverisë së Kosovës, punëtorët e KEDS-it kanë vazhduar me grevë. Gjatë së martës ata kanë pezulluar punën.

Para objektit, me seli kryesore në Prishtinë, ata ishin mbledhur nga shtatë distribucione të vendit për të kërkuar rritje të pagës dhe zbatim të Kontratës kolektive.

Kryetari i Sindikatës, Hysni Gashi, ka kërkuar që rritja e pagave të bëhet për 150 euro, e po ashtu, për punëtorët që kanë përvojë pune trevjeçare të ketë zgjatje të kontratës së punës, përcjell albinfo.ch.

“Që nga viti 2015 po i kërkojmë me ngulm këto kërkesa, por po bien në vesh të shurdhër. Do të japim një mesazh që ka ardhur fundi i durimit dhe bëjmë apel që kërkesat të merren parasysh”, ka thënë ai. Me të përfunduar fjalimet, menaxhmenti i KEDS-it i ftoi në takim krerët e sindikatave, por që nuk arritën një marrëveshje. Ndërsa kryetari i BSPK-së, Avni Ajdini, ka deklaruar se nëse kërkesat e punëtorëve nuk realizohen, do të futen të gjithë sektorët në grevë. Ndërsa në reagimin e KEDS-it thuhet se ata janë të përkushtuar që të përmirësojmë kushtet dhe beneficionet e punëtorëve. “Edhe një herë ne sigurojmë që do të vazhdojmë bashkëpunimin me sindikata në përpjekjet tona në përmirësimin e operacioneve tona, përfshirë edhe kushtet dhe mirëqenien e punëtorëve, me objektivin e qartë për të ofruar shërbim sa më të mirë për konsumatorët”, thuhet në deklaratën e kësaj kompanie.