Punëtorët e Postës në Kosovë, sot në grevë gjithëditore

Për shkak të vonesave në paga, e që ndodh tash e pesë muaj, punëtorët e Postës së Kosovë kanë hyrë në grevë gjithëditore.

Sipas njoftimit nga Sindikata e këtyre punëtorëve, sot janë mbyllur të gjitha zyrat postare në Kosovë.

“Veprimet tona nuk do të ndalen as ditëve në vijim deri në plotësimin e kërkesave tona”, thuhet në njoftimin e Sindikatës.

Këta punëtorë të premten e kaluar për një orë rresht pezulluan punën, duke kërkuar që për këtë ndërmarrje publike të ndërmerren masa për parandalimin e krizës financiare, përcjell albinfo.ch.

Vonesa e pagave, sipas kryetarit të Sindikatës së punëtorëve, Etrit Hoti, po ndodh për shkak të mospagesës së qerasë nga ana e Telekomit, e cila arrin shumën prej rreth 800 mijë eurove si dhe favorizimi që po u bëhet bizneseve private. Sindikata planifikon të ndërmarrë veprime të tjera më radikale pas grevës së sotme.