Punonjësit e hekurudhave në Belgjikë nisin grevë pesëditore

Personeli i shoqërisë kombëtare hekurudhore belge, SNCB, ka filluar një grevë që do të zgjasë pesë ditë, si shenjë kundërshtimi ndaj reformave të paralajmëruara nga qeveria.

Greva, e organizuar nga disa sindikata në mbarë vendin, do të vijojë deri në nisjen e shërbimit të fundit të trenave më 30 janar. Punonjësit shprehin pakënaqësi për ndryshimet e propozuara në strukturën organizative dhe në statusin e tyre të punës.

Që në ditën e parë të javës u shënuan anulime të shumta të linjave hekurudhore në të gjithë Belgjikën. Kompania SNCB u bëri thirrje udhëtarëve të informohen paraprakisht mbi qarkullimin e trenave dhe të përdorin alternativa të tjera transporti, duke kontrolluar faqen zyrtare të internetit.

Sipas autoriteteve, niveli i ndërprerjeve ndryshon nga dita në ditë, në varësi të sektorëve dhe personelit që i bashkohet grevës. Çrregullimet në transportin hekurudhor, i cili përdoret gjerësisht për udhëtime urbane dhe ndërurbane, po ndikojnë ndjeshëm në jetën e përditshme dhe aktivitetin profesional në vend.

Ndërkohë, qeveria federale po përgatit një projektligj për modernizimin e kompanisë hekurudhore, me synimin për të kursyer rreth 675 milionë euro. Reforma parashikon heqjen e statusit të shërbimit publik për punonjësit dhe mbylljen e kontratave të përhershme.

Gjithashtu, ndryshimet në modelin e menaxhimit synojnë t’i japin drejtuesve të kompanisë mundësinë të marrin vendime pa miratimin paraprak të sindikatave.