Putin urdhëron forcat bërthamore të jenë në gjendje të lartë gatishmërie, reagon NATO

Keystone

Presidenti rus, Vladimir Putin, ka urdhëruar ushtrinë ruse të vendosë forcat e saj bërthamore në gatishmëri të veçantë, niveli më i lartë i gatishmërisë për Forcat Raketore Strategjike të Rusisë.

Duke folur me zyrtarë të lartë ushtarakë, përfshirë ministrin e Mbrojtjes, Sergei Shoigu, ai tha se vendet perëndimore kishin ndërmarrë veprime jomiqësore ndaj Rusisë dhe kishin vendosur sanksione të paligjshme, raporton BBC.

“Siç e shihni, jo vetëm që vendet perëndimore marrin masa armiqësore ndaj vendit tonë në dimensionin ekonomik, e kam fjalën për sanksionet e paligjshme që të gjithë i dinë shumë mirë. Por, edhe drejtuesit e lartë të vendeve kryesore të NATO-s i lejojnë vetes të bëjnë deklarata agresive për vendin tonë”, mësohet të jetë shprehur Putin.

Pas këtij vendimi ka reaguar NATO.

“Kjo është retorikë e rrezikshme. Kjo është një sjellje e papërgjegjshme. Kur e kombinoni këtë retorikë me atë që ata po bëjnë në terren në Ukrainë, duke bërë luftë kundër një kombi të pavarur, sovran, duke kryer një pushtim të plotë të Ukrainës, kjo shton seriozitetin e situatës”, tha Stoltenberg për CNN