Shqipëria drejt standardizimit të mësimdhënies së shqipes në diasporë

Shqipëria po synon të shënojë një hap të rëndësishëm drejt standardizimit të mësimdhënies së gjuhës shqipe në diasporë. Kështu është thënë në njoftimin nga Qendra e Botimeve për Diasporën.

“Me një takim të organizuar në Fakultetin e Historisë dhe të Filologjisë, nën kujdesin e Ministrisë së Arsimit, Shqipëria po synon të shënojë një hap të rëndësishëm drejt standardizimit të mësimdhënies së gjuhës shqipe në diasporë. Qendra e Botimeve për Diasporën (QBD) do të shndërrohet në institucion referencë dhe do të shërbejë si bazë për ngritjen e Agjencisë Kombëtare për Gjuhën Shqipe, një strukturë e cila do të certifikojë njohjen e shqipes si gjuhë e dytë dhe do të standardizojë mësimdhënien në shkollat shqipe jashtë vendit”, thuhet në njoftim, transmeton albinfo.ch.

Bëhet e ditur se ky projekt ka për qëllim të sigurojë një qasje të qëndrueshme, të integruar dhe të matshme në ruajtjen dhe zhvillimin e gjuhës shqipe në komunitetet shqiptare jashtë kufijve.

“Ministrja e Arsimit, znj. Mirela Kumbaro, theksoi se iniciativa reflekton nevojën për të kaluar nga një fazë shpërndarjeje materialesh mësimore drejt një procesi të certifikuar dhe të njohur ndërkombëtarisht”, thuhet ndër të tjera në njoftim.