Qeveria: Frëngjishtja të jetë e detyrueshme nga klasa e pestë

Kështu, sipas propozimit të Këshillit Federal, nxënësit gjermanishtfolës do të mësojnë frëngjishten dhe ata frankofonë, gjermanishten

Nxënësit në të gjitha kantonet duhet që më së voni në klasën e pestë (klasa e fundit e ciklit të ulët të fillores) të mësojnë gjuhën e dytë të vendit, shkruan srf.ch. Kështu, nxënësit gjermanishtfolës do të mësojnë frëngjishten dhe ata frankofonë, gjermanishten.

Ky është propozimi më i ri që e ka bërë Këshilli Federal i Zvicrës dhe i cili përmes këtij varianti synon të bëjë presion mbi disa kantone të cilat kanë bërë përpjekje për të bishtnuar nga ky detyrim, transmeton albinfo.ch. Janë së paku katër kantone që duan ta fshijnë nga programet e tyre shkollore frëngjishten, edhe pse të gjitha kantonet paraprakisht ishin pajtuar që në kuadrin e programit “Harmos-Konkordat” për një zgjidhje unike.

Këshillimi që ka startuar sot shërben për të debatuar lidhur me propozimet për zgjidhje, shkruan Këshilli Federal. Por theksohet se në rast se kantonet nuk e zbatojnë strategjinë e zgjedhur, federata ka të drejtë të veprojë duke promovuar gjuhët e vendit.