Qeveria gjermane do të ndalojë pirjen e duhanit në makinat me fëmijë

Ilustrim, Pixabay

Ministria e Shëndetësisë e Gjermanisë dëshiron të ndalojë pirjen e duhanit në makina kur ka fëmijë dhe gra shtatzëna.

Sipas projektligjit, ndalimi i pirjes së duhanit do të zbatohet në të ardhmen “në automjete të mbyllura në prani të të miturve ose grave shtatzëna”, shkruan The Local.

Qeveria thotë se fëmijët nuk mund t’i shpëtojnë duhanpirjes pasive në këto lloj situatash.

Ndalimi i planifikuar do të zbatohet për cigaret e duhanit, e-cigaret, produktet e duhanit me ngrohje dhe kanabisin.

Disa shtete federale kanë kërkuar tashmë që të vendosen gjoba për këdo që kapet duke pirë duhan në makina kur fëmijët ose gratë shtatzëna janë duke udhëtuar, përcjell albinfo.ch.

Qeveria në Saksoninë e Ulët iu referua Qendrës Gjermane të Kërkimit të Kancerit, duke deklaruar se përqendrimi i duhanit në makina mund të jetë “pesë herë më i lartë se në një pijetore mesatare me tym”.

Projektligji nga Ministri i Shëndetësisë, i cili drejtohet nga Karl Lauterbach i Social Demokratëve, duhet ende të koordinohet me ministritë e tjera përpara se të paraqitet në kabinet.

Nëse ia del mbanë, më pas do të shkojë në Parlamentin gjerman (Bundestag) për t’u votuar, përcjell albinfo.ch.