Qeveria mbështet promovimin e sportit për fëmijët dhe të rinjtë

Në këtë kuadër, Këshilli Federal synon që t`i mbështesë më shumë se deri tash kampet e detyrueshme sportive shkollore, të cilat udhëhiqen sipas rregullave J+S

Këshilli Federal i Zvicrës, i bindur për ndikimin pozitiv që ka sporti dhe lëvizja për popullatën, synon të angazhohet më fuqishëm në promovimin e sportit të masave.

Fëmijët dhe të rinjtë do të përfitojnë gjatë tërë jetës së tyre nga përvojat që fitojnë gjatë marrjes me sport, thuhet në një komunikatë për shtyp të lëshuar nga Këshilli Federal, transmeton albinfo.ch. Masat konkrete që qeveria e vendit dëshiron t`i marrë në këtë drejtim përkojnë me programin më të madh që autoritetet federale kanë për promovim të sportit, “Jugend+Sport” (J+S).

Në këtë kuadër, Këshilli Federal synon që t`i mbështesë më shumë se deri tash kampet e detyrueshme sportive shkollore, të cilat udhëhiqen sipas rregullave J+S. Kështu, në të ardhmen kampet e tilla do të mbështeten me shuma më të mëdha: maksimalisht 16 franga në ditë dhe për pjesëmarrës. Aktualisht kjo mbështetje është 7.60 franga. Me këtë veprim, Këshilli Federal synon që të veprojë kundër reduktimit të mundshëm të këtyre kampeve, i cili mund të ndodhë pas caktimit nga Gjykata Federale të një kufiri maksimal për kontributet e prindërve.

Që në raportin e vet të parë, Këshilli Federal kishte shpallur këtë qëllim të tij, përcjell albinfo.ch. Këto shuma të shtuara do të vlenin për të gjithë organizatorët e kampeve J+S, që do të thotë, për shkollat, organizatat komunale ose kantonaöe si dhe për federatat nacionale sportive dhe rinore.

Po ashtu  qeveria synon t`i mbështesë më fuqishëm aktivitetet J+S me pjesëmarrjen e fëmijëve dhe të të rinjve te hendikepuar. Me këtë, ajo dëshiron t`i shtojë përpjekjet e saj për integrimin e këtyre të rinjve në aktivitetet e tyre sportive.

---