Qindra tableta mbërrijnë në Shqipëri, ndihma nga “Ecolog International”

Nisma solidare e kompanisë “Ecolog International” dhe familjes së filantropit Lazim Destani, vazhdon edhe në Shqipëri. Qindra tableta do të shpërndahen për nxënësit e shkollave 9-vjeçare, të familjeve në nevojë, të cilët në këto kushte të krijuara nga pandemia duhet të ndjekin mësimin on line në programet dhe platformat e ofruara nga Ministria e Arsimit, Sportit dhe Rinisë në Shqipëri.

Sipas një njoftimi, bëhet e ditur se kjo iniciativë është zhvilluar brenda disa javësh, në bashkëpunim me institucionet shtetërore përgjegjëse për arsimin, të cilat kanë siguruar evidencën e familjeve me vështirësi ekonomike.

Filantropi, njëkohësisht anëtar i Këshillit Koordinues të Diasporës, Lazim Destani, falënderoi institucionet shtetërore për mbështetjen e ofruar, ndërsa thekson se donacionet të tilla do të zhvillohen edhe në të ardhmen.

Deri tani Ekolog ka ndihmuar me pajisjet elektronike për zhvillimin e mësimit on line fëmijë në Maqedoni dhe Kosovë, përcjell Albinfo.ch.