Rama e quan opozitën “shtëpi publike”

"Shani e mallkoni në sa gjuhë të mundeni reformën në Drejtësi! Na akuzoni sa të doni për imoralitet nga dritarja e shtëpisë suaj publike! Ne do ta pastrojmë me rrënjë drejtësinë, s’kemi frikë nga drejtësia e vërtetë"

Pas artikullit të publikuar në prestigjiozen amerikane “The Washington Times” për vettingun dhe reformën në drejtësi në Shqipëri, ka nisur debati mes kryeministrit Rama dhe kreut të PD-së, Lulzim Basha.

Sipas gazetës amerikane, reforma në drejtësi e sponsorizuar nga fondacioni “Soros” kishte lënë Shqipërinë pa sistem gjyqësor, çka ishte në favor të kryeministrit. Përmes një postimi në Twitter, Rama ka akuzuar opozitën për sponsorizimin e këtij shkrimi. “Paguani, paguani artikuj nëpër botë kundër Vettingut! Shani e mallkoni në sa gjuhë të mundeni reformën në Drejtësi! Na akuzoni sa të doni për imoralitet nga dritarja e shtëpisë suaj publike! Ne do ta pastrojmë me rrënjë drejtësinë, s’kemi frikë nga drejtësia e vërtetë. Deri në fund”, ka shkruar Rama.

Por i menjëhershëm ka qenë reagimi i Bashës, i cili ka shkruar se me paratë e drogës Rama bleu drejtësinë dhe ambasadorë. “Drejtësinë e ka kapur, por popullin nuk e kap dot. Kokat e krimit e korrupsionit do të japin llogari para tij. Shumë shpejt”, ka shkruar Basha.