Rama paralajmëron zgjidhje për kontestin detar me Greqinë

Kryeministri i Shqipërisë, Edi Rama, shumë shpejt do të takohet me homologun grek, Aleksis Tsipras. Lajmin e ka bërë të ditur vetë shefi i ekzekutivit shqiptar, në një intervistë për agjencinë greke të lajmeve amna.gr, përcjell albinfo.ch.

Rama ka thënë se me kryeministrin grek, Tsipras, do të mundohen të zgjidhin çështjet e hapura mes dy vendeve.

I pyetur nëse ishte planifikuar një takim mes tij dhe kryeministrit grek, Rama u përgjigj: “Ne nuk e dimë se ku, në Tiranë apo në Athinë, por presim të takohemi së shpejti. Unë mendoj se ne jemi shumë afër zgjidhjes së gjithë kësaj dhe kjo do të ishte e mrekullueshme”, shtoi ai. Kryeministri i Shqipërisë përshkroi marrëdhënien e fqinjësisë mes Greqisë dhe Shqipërisë si “historike dhe tradicionale”.