Rastet e koronavirusit bien, ekspertët nuk pajtohen

Ekspertët, ende të alarmuar.

Tregjet globale shënuan rritje pas këtij informacioni, por ekspertë të tjerë ndërkombëtarë janë të alarmuar për përhapjen e virusit, i cili ka vrarë më shumë se 1.100 njerëz.

Këshilltari kryesor mjekësor i Kinës, Zhong Nanshan, tha se numri i rasteve të reja po bie në disa provinca.

“Shpresoj se ky shpërthim i virusit mund të përfundojë diku në muajin prill”, tha Zhong.

I pyetur në lidhje me parashikimin e Zhong, drejtori kryesor mjekësor i Australisë, Brendan Murphy, tha se “është shumë e parakohshme të thuhet kjo”.

Numri i të infektuarve në Kinë ka arritur në 44,653, thanë zyrtarët shëndetësorë, përfshirë 2,015 raste të reja të konfirmuara të martën.

Ky është numri më i ulët ditor i rasteve të reja që nga 30 janari.

Ndërsa zyrtarët kinezë thanë se situata ishte nën kontroll, Organizata Botërore e Shëndetësisë (OBSH) paralajmëroi se epidemia paraqet një kërcënim global potencialisht më të keq se terrorizmi.

Rasti më kritik jashtë Kinës është në një anije lundrimi, e cila është vënë në karantinë në portin e Japonisë, Yokohama, me rreth 3.700 njerëz në bord.

Zyrtarët japonezë thanë se 39 persona të tjerë kanë dalë pozitivë në testin e virusit, duke e çuar numrin e të infektuarve në anije në 175.

---