Në Kosovë, humbin jetën 6 persona të prekur me COVID-19

Kosova sot ka shënuar rekord të viktimave nga COVID-19. Brenda 24 orëve nga ky virus kanë vdekur 6 pacientë, duke e çuar në 64 numrin e personave që humbën betejën me këtë virus, që nga fillimi i pandemisë në Kosovë.

Lajmi është konfirmuar nga Ministria e Shëndetësisë përmes një njoftimi.

“Qendra Klinike Universitare e Kosovës, përkatësisht klinikat e saj ku po trajtohen pacientët e prekur nga Covid-19 kanë njoftuar se gjatë ditës së sotme, 4 korrik 2020, deri në ra 17:00 kanë përfunduar me vdekje 6 pacientë të infektuar me COVID-19: Në Klinikën Infektive 1 pacient, në Klinikën e Pulmologjisë 2 pacientë dhe në Mjekësinë Sportive 3 pacientë.  Pacientët që kanë përfunduar me vdekje janë: Sh.I. (1949) -Prishtinë; F.H (1948) -Viti,  R.K (1950)-Mitrovicë, B. G (1960)-Vushtrri, S. T. (1949) – Fushë Kosovë dhe V. SH. (1982)- Pejë. Sipas informacioneve nga klinikat, pacientët që kanë ndërruar jetë sot, përveç infeksionit Covid-19, kishin edhe sëmundje të tjera shoqëruese”, thuhet në njoftimin e MSH-së, përcjell albinfo.ch.

Një nga viktimat që u raportua sot, ishte edhe një 38 vjeçar, i cili është një nga pacientët më të ri në moshë që ka nderuar jetë si pasojë e COVID-19.

Deri tani në Kosovë janë prekur me koronavirus 3 mijë e 178 persona, ndërsa janë shëruar 1 mijë e 824.