Rënie e mëtejshme e investimeve të huaja në Kosovë

Ekspertët vlerësojnë se investitorët nuk vijnë vetëm me promovim, por duhet të përmirësohet klima e të bërit biznes, gjyqësori dhe zbatimi i kontratave

Për promovim të investimeve gjatë vitit 2012, Ministria e Tregtisë dhe Industrisë (MTI) ka shpenzuar mbi 1.4 milion euro. Këto të dhëna i kishte publikuar Zyra e Auditorit të Përgjithshëm (ZAP).

Zyrtarët e MTI-së kanë thënë se Agjencia për Promovim të Investimeve për vitin 2012 nga 1.4 milion euro ka shpenzuar 1 milion euro në reklamë të “CNN”-it, ndërsa 33 mijë e 900 i ka shpenzuar në publikime të shprehjes së interesit të projektit me interes shtetëror “Brezovica” në revistën prestigjioze “The Economist” si dhe në gazetën “Financial Times” etj.

“Për të gjitha shpenzimet e mësipërme me përpikëri janë respektuar rregullat e prokurimit”, ka thënë Arta Istrefi, këshilltare për media në MTI, transmeton koha.net

Ndërkaq ekspertët vlerësojnë se investitorët nuk vijnë vetëm me promovim, por duhet të përmirësohet klima e të bërit biznes, gjyqësori dhe zbatimi i kontratave.