Rënie rekorde e kërkesave për pasaportën zvicerane

Rënie veçanërisht e madhe e kërkesave për pasaportën zvicerane është shënuar te shtetasit e Serbisë dhe ata të Gjermanisë

Gjatë vitit 2012 ka pasur dukshëm më pak të huaj që kanë kërkuar shtetësinë zvicerane. Siç bën të ditur Zyra Federale për Migracion (BFM), numri i të huajve që në vitin 2012 janë natyralizuar ka qenë 33456, ose afër 10 për qind më pak se një vit më parë. Është kjo shifra më e ulët e natyralizimit e shënuar gjatë më shumë se dhjetë viteve të fundit. Rënie veçanërisht e madhe e kërkesave për pasaportën zvicerane është shënuar te shtetasit e Serbisë dhe ata të Gjermanisë, të cilët për një kohë të gjatë përfaqësonin grupet më të mëdha që kërkonin natyralizimin.

Kjo tregon se fluksi i madh i shënuar viteve të fundit i gjermanëve drejt Zvicrës mund të quhet i përfunduar.

Shtetasit gjermanë vetëm nga viti 2007 kanë fituar të drejtën që kur të marrin shtetësinë zvicerane të mund të ruajnë edhe shtetësinë gjermane. Dhe kjo e drejtë ka bërë që në dy vitet pasuese të kishte një fluks të madh të kërkesave të gjermanëve për të marrë shtetësinë zvicerane. Me kohë ky trend është qetësuar. Kësaj tendence i ndihmon edhe fakti se shtetasit e vendeve të BE-së, që nga miratimi i Marrëveshjes për lëvizje të lirë gëzojnë në Zvicër pothuaj të njëjtat të drejta sikur qytetarët zviceranë

Gjatë vitit 2012, pasaportën zvicerane e kane marrë vetëm 3000 shtetas gjermanë.

Ndër faktorët që, sipas BFM-së kanë mundur të ndikojnë në uljen e interesimit për pasaportën zvicerane është edhe kriteri më i ashpër që është vendosur tashmë në disa kantone, ku kërkohen kurse të gjuhës si kusht, shkruan gazeta Der Sonntag.