Rinis furnizimi i Evropës me gazin rus

Keystone (AP Photo/Bela Szandelszky)

Rusia rihapi rubinetin e saj të gazit për Europën, pas një ndërprerjeje 10 ditore. Gazsjellësi Nord Stream 1 është vendosur sërish në funksion me përfundimin e punimeve të mirëmbajtjes. Ka pasur dyshime të forta dhe frikë se Moska nuk do të rikthente furnizimet me gaz në kundërpërgjigje ndaj sanksioneve të Bashkimit Europian lidhur me luftën në Ukrainë.

“Jam i lehtësuar që pak gaz po rrjedh sërish. Në të njëjtën kohë, unë besoj se ne si vend nuk duhet ta lëmë veten të shantazhohemi nga Rusia dhe kështu ndjenjat e mia janë të përziera”, shprehet Jens Hofmeister, shtetas i Gjermanisë.

“Për konsumatorët mund të jetë pozitive, natyrisht, nëse ka një ndikim pozitiv në çmimet e gazit. Sidomos për familjet më të varfra ky lajm mund të ketë një efekt qetësues. Në nivel politik, ndoshta nuk është një lajm i mirë, kështu që jam disi e dyzuar”, tha Michaela Boyen, shtetase e Gjermanisë.