Rreth 350 mijë ndërtime pa leje

Ministria e Mjedisit dhe Planifikimit Hapësinor, ka përfunduar të premten zyrtarisht procesin e regjistrimit të ndërtimeve pa leje. Sipas të dhënave zyrtare  në nivel vendi janë paraqitur 343.177 ndërtime pa leje, ndërsa në proces janë afërsisht edhe 10 mijë kërkesa që pritet të futen në regjistër.

Me këtë rast ministri i Mjedisit, Ferid Agani, pranoi se procesi i rishikimit të aplikacioneve, nuk do të jetë i lehtë, por shtoi se me ndihmën e komunave dhe mekanizmave ndërkombëtarë këtë proces që e quajti madhështor, do të arrijnë ta përmbyllin me sukses.

“Ligji për Planifikim Hapësinor iu jep organeve të nivelit qendror dhe lokal më shumë mjete për planifikim më të mirë të zhvillimit dhe përdorim të mjediseve të tyre urbane dhe rurale. Dhe tash, pasi janë miratuar ligjet bashkëkohore, Ligji për Trajtimin e Ndërtimeve Pa Leje na ndihmon në zgjidhjen e problemeve nga e kaluara”, tha Agani.

Këtë projekt e kanë përkrahur USAID-i dhe Zyra e Bashkimit Evropian, që kanë kontribuuar në organizimin e resurseve, zhvillimin e trajnimeve, ndërtimin e kapaciteteve, përpilimin e rregulloreve dhe udhëzimeve teknike dhe në kontaktin me komunitetin dhe hisedarët e tjerë.

Në prezantimin e projektit Zëvendësshefi për Bashkëpunim nga Zyra e Bashkimit Europain, Libor Chlad, tha se procesi i legalizimit kërkon shumë punë, prandaj mbetet ende për t’u bërë.

Në këtë ngjarje ishte e pranishme edhe Koordinatorja për Ndihmë të Shteteve të Bashkuara për Evropë dhe Euro-Azi, Alina Romanowski, e cila i dha mbështetje procesit të legalizimit, duke shtuar se janë të angazhuar që të ndihmojnë Kosovën në zhvillimin e mëtutjeshëm ekonomik.