Rreth 6,500 rusë hynë në Finlandë në vetëm dy ditë

@pixabay

Autoritetet finlandeze kanë njoftuar se rreth 6500 qytetarë të Rusisë kanë hyrë në Finlandë të hënën, më 19 shtator dhe të martën, më 20 shtator.

Është shpjeguar se Finlanda ka regjistruar një numër kaq të madh të mbërritjeve nga Rusia, pasi vendi aktualisht është e vetmja rrugë tokësore përmes së cilës rusët mund të arrijnë në vendet e tjera të Bashkimit Evropian që nuk kanë vendosur ndalim hyrjeje për ta, përcjell albinfo.ch.

Finlanda u bë i vetmi vend fqinj i Rusisë që lejoi hyrjen për ata që plotësojnë rregullat e hyrjes të hënën, më 19 shtator, pasi vendet e tjera – Estonia, Letonia, Lituania dhe Polonia – vendosën një ndalim të hyrjes për rusët dhe vendosën të mos lëshojnë më Viza Shengen për ta.

Kështu, duke qenë se rusët nuk ishin në gjendje të hynin në vendet e tjera fqinje, numri i atyre që vendosën të hynin në Finlandë u rrit ndjeshëm.

Të dhënat e siguruara nga Roja Kufitare Finlandeze tregojnë se gjithsej 3,099 shtetas të Rusisë hynë në Finlandë përmes kufirit lindor të hënën, dhe 3,403 të tjerë hynë në Finlandë të martën. Përveç kësaj, u zbulua se deri në 35 për qind e rusëve që mbërritën në Finlandë gjatë kësaj periudhe dyditore kishin viza të vlefshme Shengen.

Për më tepër, autoritetet finlandeze njoftuan se numri i rusëve që mbërrijnë në Finlandë pritet të rritet edhe më shumë tani që Putin ka urdhëruar një mobilizim të pjesshëm të rezervistëve, përcjell tutje albinfo.ch.