Rrëzohet aeroplani me 157 persona, nuk raportohet për të mbijetuar

Një tragjedi ajrore ka ndodhur paraditen e sotme. Aeroplani i “Airlines Ethiopian”, është rrëzuar pranë qytetit të Bishoftu,  62 kilometra në juglindje të kryeqytetit “Addis Abeba”.

Aeroplani me 157 persona në bord udhëtonte nga kryeqyteti i Etiopisë drejt Nairobit, por sipas “Reuters” kompania e fluturimit ka njoftuar rrëzimin e tij.

“Është konfirmuar se aksidenti ka ndodhur në 08:44”, raporton Reuters, përcjell albinfo.ch.

“Aeroplani Boeing 737 transportonte 149 pasagjerë dhe tetë anëtarë të ekuipazhit. Ai u ngrit në orën 08:38 nga Addis Ababa, në Etiopi. Në këtë kohë operacionet e kërkim-shpëtimit janë në zhvillim e sipër dhe ne nuk kemi informacion të konfirmuar për të mbijetuarit”, ishte komunikata nga kompania ajrore.

“Stafi i Airlines Ethiopian do të dërgohet në skenën e aksidentit dhe do të bëjë gjithçka të mundshme për të ndihmuar shërbimet e emergjencës”, shtoi ajo.

Kryeministri Abiy Ahmed ofroi “ngushëllimet më të thella për familjet e atyre që kanë humbur të dashurit e tyre”.