Rriten infektimet me Covid-19 në Maqedoninë e Veriut

Autoritetet shëndetësore në Maqedoninë e Veriut kanë njoftuar për rritje të numrit të të infektuarve me Covid-19.

Sipas të dhënave të fundit, gjatë 24 orëve janë shënuar 593 raste të reja infektimi nga 3,391 teste për COVID-19. Numri më i madh i tyre është në Shkup. Javën e fundit, të rinjtë e moshës nga 20 deri 29 vjeç kanë qenë më të prekur.

“Në spitale janë shtruar 476 pacientë, 8 prej të cilëve në gjendje më të rëndë, sipas Institutit të Shëndetit Publik. Numri i viktimave, që nga shpërthimi i pandemisë, ka arritur në 7,160. Shkalla e vdekshmërisë vazhdon të jetë ndër më të lartat jo vetëm në krahasim me vendet e Ballkanit, por edhe më gjerë. Ndërkohë, rreth 6,900 janë raste aktive. Në mesin e viktimave të regjistruara të marten, është një vajzë 16 vjeçe nga rrethinat e Tetovës, për të cilën mjekët thanë se ishte sjellur në spital në gjendje tepër të vështirë, ndërkohë që nuk kishte qenë e vaksinuar. Mjekët nuk kishin dijeni nëse pacientja kishte pasur sëmundje kronike”, thuhet në raport.

---