Rritet numri i fluturimeve në Shqipëri

Numri i fluturimeve ajrore në Shqipëri përgjatë muajit qershor 2018 shënoi një rritje prej 13.1% krahasuar me të njëjtin muaj të një viti më parë.

Shqipëria tashmë ka hyrë në hartën e destinacioneve turistike evropiane, duke reflektuar një interes në rritje të numrit të turistëve dhe vizitorëve të shumë që vizitojnë Shqipërinë. Instituti i Statistikave (INSTAT) njoftoi se vetëm në qershor të këtij viti numri i fluturimeve arriti në 2314, shkruan “ATSH”.

Sipas INSTAT-it, numri i pasagjerëve që kanë udhëtuar me linja ajrore në gjashtëmujorin e parë 2018 është 1 270 329 duke u rritur me 13.4 %, krahasuar me të njëjtën periudhë të një viti më parë, përcjell albinfo.ch.

Vitet e fundit Shqipëria përmes aeroportit të vetëm ndërkombëtar “Nënë Tereza”, ka shënuar një rritje progresive të numrit të pasagjerëve.

Në gjashtëmujorin e parë 2018, numri i fluturimeve të kryera arriti në 11 774 fluturime, duke u rritur me 9.6 %, krahasuar me njëjtën periudhë të një viti më parë.

Sipas INSTAT, në gjashtëmujorin e parë 2018, transporti ajror i pasagjerëve zuri 72.7 % të totalit të transportit në Shqipëri.