Rritet numri i turistëve kinezë në Shqipëri

Ambasadorja e Kinës në Shqipëri, Jiang Yu, në një takim që ka pasur me kryetarin e Kuvendit, Gramoz Ruçi, ka thënë se numri i turistëve kinezë vitin e fundit që kanë vizituar Shqipërinë është rritur për 64 për qind, shkruan Albinfo.ch

“Kina dhe Shqipëria kanë një bashkëpunim intensive, vuri në dukje ambasadorja Yu. Të dy vendet kanë nënshkruar 28 marrëveshje bashkëpunimi në 17 fusha, investimet e akumuluara kineze në Shqipëri janë dyzetfishuar dhe numri i turistëve kinezë vitin e fundit u rrit 64%. Kina ka qenë një mik i sinqertë dhe partner i besueshëm i Shqipërisë”, ka thënë ambasadorja.

Ndërsa kryetari i Kuvendit, Ruçi, falënderoi ambasadoren Yu për misionin e saj të suksesshëm në Tiranë dhe kontributin në fuqizimin e marrëdhënieve e të bashkëpunimit dypalësh.

“Kina është një fuqi e madhe globale dhe Shqipëria është e interesuar të forcojë bashkëpunimin me këtë shtet të madh e të fuqishëm”, nënvizoi kryetari Ruçi.

Kryetari i Kuvendit vlerësoi edhe nismat e fundit të qeverisë kineze për zgjerimin e bashkëpunimit me Shqipërinë dhe vendet e rajonit.