Sa është dëmi nga protestat e ‘Jelekverdhëve’ në Paris

EPA/YOAN VALAT

‘Jelekët e verdhë’ do t’i kushtojnë ekonomisë franceze 0.2 pikë përqindje në terma të rritjes ekonomike, deklaroi kreu i financave franceze, Bruno Le Maire.

Protestat e atyre që tanimë njihen në mbarë botën si ‘jelekverdhët’ kanë nisur që prej mesit të muajit nëntor dhe ende nuk janë ndalur. Ata protestojnë për rritjen e çmimeve të karburantit si dhe koston e lartë të jetesës.

Lëvizja e cila u transformua në një valë mjaft të gjerë proteste ndaj Emmanuel Macron dhe reformave të tij, duket se i ka shkaktuar dëme mjaft të mëdha ekonomisë së dytë më të madhe të Eurozonës, transmeton ‘Scan’.

Në kulmin e tyre, gjatë dhjetorit, protestat detyruan shumë biznese që të mbylleshin në qendër të Parisit, por edhe në qytete të tjera, si rrjedhojë e akteve të paprecedentë të vandalizmit, përcjell albinfo.ch.

“Është një kosto tejet e lartë, në nivelin e 0.2 pikë përqindje të rritjes ekonomike në një tremujor, çka është shumë”, deklaroi Bruno le Maire.

Kjo shumë përkthehet në rreth 2.5 miliardë euro. Sipas zyrës franceze të statistikave, rritja ekonomike në tremujorin e fundit të vitit të kaluar ishte në 0.3%.