SBASHK: Kompensim të orëve të humbura s’do të ketë as gjatë pushimit pranveror

Sindikata e Bashkuar e Arsimit, Shkencës dhe Kulturës në Kosovë ka bërë të ditur se nuk do të ketë kompensim të orëve të humbura në grevë as gjatë pushimit pranveror, megjithëse për një gjë të tillë po insiston Ministria e Arsimit.

Kjo gjë ka sjellë shumë huti te mësimdhënësit dhe nxënësit që ka ndarë në dysh opinionin në Kosovë. Një pjesë janë që orët të zëvendësohen, e një pjesë tjetër janë kategorik kundër.

“Me qëllim që të njoftohet edhe një herë opinioni, SBASHK-u përsërit se pushimi pranveror nga data 1 deri më 5 prill 2019 do të fillojë sipas Kalendarit shkollor 2018-2019, aprovuar në fillim të vitit shkollor, pra, s’ka zëvendësim të orëve të humbura as gjatë pushimit pranveror e as vikendeve”, thuhet në njoftimin e Sindikatës së arsimit.

Për këtë çështje edhe Kuvendi i Kosovës ka mbajtur një seancë të jashtëzakonshme, por nga aty nuk u gjend zgjidhje.