Scholz: Putin po përpiqet të ndajë Evropën

Kancelari gjerman Olaf Scholz foli sot sërish rreth luftës në Ukrainë mirëpo ai u fokusua tek Rusia dhe presidenti Putin.

Sipas tij, Putin ka frikë se “shkëndija e demokracisë” do të përhapet në vendin e tij. Madje kancelari gjerman shtoi se Putin po përpiqet të ndajë Evropën dhe të kthehet në një botë të dominuar nga sferat e ndikimit, transmeton Albinfo.ch.

Në një intervistë për Merkur, Scholz u pyet nëse Putin do të pranonte afrimin e Ukrainës me Bashkimin Evropian. Përgjigja e kancelarit gjerman ishte se “presidenti rus duhet të pranojë se ka një komunitet në rritje të demokracive të bazuara në ligj në lagjen e tij”. “Ai padyshim ka frikë se mos shkëndija e demokracisë do të përhapet në vendin e tij”, tha kancelari gjerman.

Schlz për më tepër vlerësoi se presidenti rus Putin dëshiron një Evropë të ndarë dhe një kthim në sferën e ndikimit, porse siç u shpreh ai, nuk do të ketë sukses.

Scholz paralajmëroi se rritja e çmimeve të energjisë ndoshta do të zgjasë për një kohë të gjatë dhe hodhi poshtë pretendimin e Rusisë se ka ndërprerë furnizimin me gaz pasi mungojnë pjesët e nevojshme rezervë për shkak të sanksioneve.

“Ky shpjegim nuk është bindës”, tha kancelari gjerman.

---